Taliyaha Booliska qeybta Gobolka Baay Gaashaanle Sare Aamin Maxamed Daruur ayaa shir gudoomiyey shirka todobaadlaha Gollaha Amniga dowlad Goboleedka Koonfur Galbeed oo ka dhacay Magaalada Baydhabo.
Shirka ayaa waxaa looga hadlay Arrimo kala duwan oo ay kamid yihiin udiyaar garowga Howlgalo ka dhan ah dagaalamayaasha Al-shabaab iyo sidii loo xoojin lahaa sugida amniga Magaalooyinka Maamulka ee lagu qabanayo doorashada.
Taliye Aamin Daruur ayaa Saraakiisha kulanka ka qeyb galay u sheegay inay muhiim tahay dardar-gelinta howlaha lagu xaqiijinayo amniga, maadaama Magaalooyinka Baydhabo iyo Baraawe ay ka dhacayaan doorashada Baarlamaanka Federaalka.
Sidoo kale Taliyaha Booliska qeybta Gobolka Baay ayaa shacabka ugu baaqay inay la shaqeeyaan laamaha amniga Maamulka Koonfur Galbeed, si looga hortegayo falalka amni darro ee xiliyada qaarkood geystaan Al-shabaab.
Magaalooyinka Baydhabo iyo Baraawe ayaa kamid ah Magaalooyinka loo Asteeyay inay ka dhacaan doorashooyinka Xildhibaanada Baarlamaanka Federaalka gaar ahaan Golaha Shacabka, doorashada Aqalka Sare ee Koonfur Galbeed ay ka qabsoontay Baydhabo.
Kulankaan dhacay ee looga hadlay amniga ayaa waxaa ka qeyb galay Taliyeyaasha Ciidamada Booliska, Milateriga, Nabadsugida iyo kuwa Taliska AMISOM ee ka howlgala deegaanada Maamulkaas.
