Wasiirka Wasaaradda Warfaafinta dhaqanka iyo dalxiiska Xukuumadda federaalka Soomaaliya (XFS) Maxamed Cabdi Xayir Maareeye oo ku hadlaya magaca Dowladda Federaalka Soomaaliya ayaa ka tacsiyeeyay geerida ku timid Allaha u naxariistee Abwaan Xudeydi oo kamid ahaa Hobalada Qaranka ee Waaberi.
Wasiirka ayaa qoyska ,ehelada,asxaabta, Hobalada Waaberi iyo guud ahaan Ummadda Soomaaliyeed uga tacsiyeeyay geerida abwaan Axmed Ismaaciil Xuseen “Xudeydi” oo cudurka karoona fayras ugu geeriyooday dalka Ingiriiska wuxuuna Alle uga baryay inuu naxariistii Janno ka waraabiyo.
Xudaydi waxa uu dhashay, 1928-kii, waxaana uu jirey 92 sano, isagoo ku dhawaad qarnigaa ahaa tiir aan liicin oo uu leeyahay fanka Soomaalidu.
Xudaydi Waxa uu ku dhashay Magaalada Berbera, waxaana uu dhallinyaronimadiisii ku soo qaatay Magaaladda Cadan ee dalka Yeman, ka hor intii uusan soo noqon dalka.
