Wasaaradda amniga dowlad Goboleedka Koonfur Galbeed ayaa sheegtay in xubin ka tirsan Al-shabaab uu saakay isku soo dhiibay Ciidamada dowladda Federaalka iyo kuwa maamulka Koonfur Galbeed.
Qoraal kooban oo ay Wasaaradda amniga Maamulka ayaa waxaa lagu sheegay in Maxamed Ibraahim Cabdi oo ka tirsan Al-shabaab uu iska dhiibay degmada Diinsoor ee Gobolka Baay oo ay ku sugan yihiin Ciidamada.
Koonfur Galbeed ayaa sheegtay in Maxamed Ibraahim oo 17 sanno jir ah loo yaqaano Fu’aad, isla markaana uu ka howlgeli jiray deegaano ka tirsan Maamulk oo ay ku sugan yihiin dagaalamayaasha Al-shabaab.
“Maxamed Ibraahim Cabdi oo magac Af-garashadiisu tahay Fu’aad, Da’diisuna tahay 17 sano ayaa saakay isku soo dhiibay Ciidanka Xoogga Dalka iyo daraawiishta DKGS Degmada Diinsoor ee Gobolka Baay” ayaa lagu yiri Qoraalka Wasaaradda amniga.
Xubno Saraakiil ah oo ka tirsanaa Al-shabaab ayaa horey isugu soo dhiibay Ciidamada dowladda Federaalka Soomaaliya iyo kuwa maamulka Koonfur Galbeed, kuwaasi oo qaarkood markii hore xiriiro lasoo sameeyay Saraakiisha Ciidamada.
