Xisbiga Garabka Midigta ee Walaalaha Talyaaniga (Fratelli d’Italia) ayaa su’aal ka keenay Doorka Sirdoonka Turkiga ee ka qeyb galay Hawlgalkii dhawaan lagu soo badbaadiyey Haweeneyda Talyaaniga ee Silvia Romano.
Madaxa Guddiga Arrimaha Dibedda ugu qaabilsan Xisbigaasi, Karlo Fedanza waxa uu ugu baaqay Ra’siul-wasaaraha Xukuumadda Talyaaniga, Jesepe Konte inuu faahfaahin ka bixiyo Xiriirka ay la leeyihiin Dowladda Turkiga, kadib, markii ay Hay’adda Sirdoonka Turkiga ka qeyb-galeen Hawlgalkii lagu soo badbaadiyey Haweeneyda Samafalaha ahayd ee Silvia Romano.
“Waxaa jira meelo badan oo uu mugdi ku jiro, laga bilaabo Mas’uuliyadda kuwii u diray Silvia Romano inay ka soo shaqeyso deegaan ka tirsan Kenya oo aan lahayn xitaa Heerka ugu liita ee Ammaanka†ayuu yiri Karlo Fedanza.
Waxa uu intaasi ku daray in Talyaaniga lagu khasbay inay cadad badan oo lacag ah ku bixiyaan madax-furashada la siiyey Alshabaab iyo in la isklu haleeyo Dhexdhexaadinta Turkiga, waa sida uu hadalka u dhigay.
Wakaalladda Wararka Talyaaniga ee Aki News Agency oo Warkan ku soo daabacday Websaytkooda waxay ka soo xigatay Madaxa Guddiga Arrimaha Dibedda ugu qaabilsan Xisbiga Walaalaha Talyaaniga (Fratelli d’Italia), Karlo Fedanza inuu ka codsaday Xukuumadda Ra’isul-wasaare Konte inay sharaxaad ka bixiyaan halka iyo sida uu isku bedelay Xiriirka lala leeyahay Talyaaniga, kadib, sii-dayntii Silvia Romano.
Dhinaca kale, Dood ballaaran ayaa waxay hareysay qaabkii loo sii daayey Haweeneydaasi iyo Eedeymaha ku aadan inay Dowladda Talyaaniga bixiyeen Laaluush.
Wasiirka Arrimaha Dibedda ee Talyaaniga, Luji de Mayo waxa uu Boggiisa Rasmiga ee Facebook-ga ku qoray mahadcelin uu u jeediyey dadaalka Ragga iyo Haweenka ee dalak ka geysteen inay Silvia Romano dib ugu soo laabato Talyaaniga.
Waxa kale oo uu qoray inay tani tahay arrinta keliya ee muhiimka ah.
Xisbiga Mucaaradka ee Walaalaha Talyaaniga (Fratelli d’Italia) waxaa Guddoomiye ka ah Jorjiya Meloni oo xubin ka ah Golaha Xildhibaanadda ee dalkaasi, waxaana Xisbiga la asaasay bishii December ee sanadkii 2012-kii, kadib, markii uu kala jabay Xisbigii kale ee lagu magacaabi jirey Xisbiga Dadka Xorriyadda ee Popolo della Liberta ee loo yaqaano PDL
Si kastaba ha ahaatee, Xukuumadda Talyaaniga weli si rasmi ah ugama jawaabin Su’aalaha ka soo yeeray Xisbiga Mucaaradka ee Walaalaha Talyaaniga (Fratelli d’Italia) ee ku aadan Tuhunka Xiriirka Talyaaniga iyo Turkiga ee Hawlgalka ay Sirdoonka Turkiga kaga qeyb galeen sidii loo soo badbaadin lahaa Haweeneyda Samafalka ee Silvia Romano, taasi oo bishii November ee sanadkii 2018-kii laga soo qafaashay gudaha dalka Kenya.
Links-ga ka akhriso :Â https://www.adnki.net/AKI/?p=59385
Xigasho: Aki News Agency
