Ciiddanka Badda ee dalka Indonesia waxay Jimcihii la soo dhaafay gacanta ku dhigeen 8 Tahriibayaal Somaali oo la socotay dooni ka soo ambabaxday dalka Malaysia.
Sida lagu soo daabacay Wargeyska The Jakarta Post waxay Muwaadiniinta Soomaalida la socdeen dooni laga leeyahay dalka Indonesia oo ka timid dalka Malaysia, soona martay Badda Bagan Asahan ee Waqooyiga Jesiiradda Samatra.
Madaxa Xiriirka Dadweynaha iyo Agaasimaha Guud ee Socdaalka ee Wasaaradda Garsoorka iyo Xuquuqda Aadanaha ee dalka Indonesia, Agung Sampurno ayaa sheegay in Ciiddanka Badda oo ilaalo ah qabteen doonidii ay la socdeen 8-da qof ee Soomaalida.
Waxa uu intaasi ku daray inuu Kabtanka iyo Shaqaalihii ka boodeen Doonida, una baxsadeen dhul hawd ah, iyagoo horey u sii qaatay Baasabooradii 8-da qof ee Soomaalida oo sheegtay inay ka yimaadeen dalka Malaysia.
Sida laga xigtay Hay’adda QM ugu qaabilsan Arrimaha Qaxootiga (UNHCR), 150,845 Qaxooti iyo Magangelyo-doon ayaa ku nool dalka Malaysia, halka dalka Indonesia ku nool yihiin 14,000 oo Qaxooti ah, kuwaasi oo deggan Xarumaha shisheeyaha lagu hayo iyo Guryo Bulshddu leedahay iyo goobo kale.
©Radio Dalsan
