(MUUQAAL): Nin Qaxooti ah oo Dhalashadda Faransiiska ku muteystay ilmo yar oo uu badbaadiyey

Wiil dhallinyaro oo u dhashay dalka Maali ayaa loo aqoonsaday Geesi, kadib, markii uu soo badbaadiyey  wiil 4 jir ah oo noloshiisa khatar ku jirtay.

Ninka Dhallinyarada oo lagu magacaabo Mamoudou Gassama waxa uu si dhaqso leh u soo badbaadiyey Wiilka yar oo ka soo laalaaday Balakoonka Dabaqa 4-aad ee dhismo ku yaalla Waqooyiga magaalladda Paris.

Mamoudou Gassama oo 22-jir ah ayaa la arkayey isagoo  isaga oo isaga kala gudbaya Balakoonadda, wuxuuna markii uu gaaray Balakoonka Dabaqa 4-aad la arkayey isagoo mid ka mid ah lugtiisa saarayo Balakoonka, ka hor inta uusan gacantiisa midig ku soo qabanin Wiilkii yaraa ee khatarta ugu jiray inuu ka soo dhaco Dabaqaasi

Kooxaha Dab-damiska ayaa yimid goobta, si ay u helaan Ilmaha Yaroo mar hore la soo badbaadiyey.

Afhayeenka Adeegga Nolosha ee dalka Faransiiska ayaa ammaanay Ninka u dhashay dalka Maali ee sida geesinimadda leh u soo badbaadiyey wiilka yar.

Haweeneyda ah Duqa magaalladda Paris, Anne Hidalgo ayaa u mahad celisay Ninka dhallinyarada ee  sida geesinimadda leh u soo badbaadiyey Wiilka Yar.

Qoraal ay barteeda Twitter-ka soo dhigtay ayey ku sheegtay inuu isaga u sheegay inuu dhowr bilood ka hor ka yimid dalka Maali, isagoo ku riyoonayey inuu Nolol cusub ka dhiso Faransiiska.

Waxay ju sheegay ninkaasi inay Geesinimadiisa tusaale u tahay Muwaadiniinta oo dhan, isla markaana Maamulka Paris ka taageeri doonaan dadaalkiisa ku aadan Deganaanshaha gudaha Faransiiska.

Dhinaca kale, Mamoudou Gassama waxa uu Madaxweynaha dalka Faransiiska, Emmanel Macron maanta kula kulmay Qasriga Madaxtooyadda ee Elysee Palace.

Waxaana  lagu abaal mariyey Geesinimadda uu wiilka yar ku badbaadiyey.

Madaxweynuhu waxa uu ku  dhawaaqay in Mamoudou Gassama oo ah Muhaajir aan Dukumenti lahayn la siinayo Dhalashadda Faransiiska, kuna biiri doono  Hay’adda Adeegga Dab-damiska.

Mamoudou Gassama waxa uu Saxaafadda u sheegay inuu arkay dad badan oo qeylinayey iyo dhawaaqa hoonka gawaarida, isagoo sheegay inuu kor u fuulay sidaas oo kale.

Wuxuuna Rabbi uga mahad celiyey sida uu u badbaadiyey wiilka yar.

“Waxaan cabsi dareemay, markii aan Wiilka soo badbaadiyey, markii aan tegnay Qolka Jiifka waxaan bilaabay inaan dadka salaamo, waxaa igu adkayd inaan istaagnaado, waxaan u baahnaa inaan fariisto” ayuu yiri Mamoudou Gassama.

Waxaa laga soo xigtay Walaalkiisa inuusan Mamoudou haysanin waraaqaha muhiimka si uu Deganaansho uga helo Faransiiska, isla markaana uu uu Warqad Dal-ku-joog KMG ah haystay.

HALKAN KA DAAWO MUUQAALKA QAABKA  LOO SOO BADBAADIYEY WIILKA YAR:

https://youtu.be/pd79zyrwSKU

https://youtu.be/X6i_uTF0-wE

WQ. Ustaad Nuradin