Wararka Idaacada Dalsan ee Magaalada Muqdisho ay ka heleyso Ex Control Afgooye ayaa waxaa ay sheegayaan in halkaasi uu ka dhacay Qarax khasaaro geystay.
Qaraxa ayaa waxaa la sheegay in uu ahaa Miino dhulka lagu aasay,waxaana lala eegtay Ciidamo Boolis ah oo xiligaas ku sugnaa Ex Control Afgooye,iyadoona ay ka soo baxayaan warar kala duwan.
Dad goobjoogayaal ah oo la hadlay Dalsan ayaa u sheegay in qaraxa jugtiisa laga maqlay Xaafado ku dhow goobta uu falka ka dhacay,waxaana sidoo kale ay inoo sheegeen in lagu aasay wadada dhinaceeda.
Hal ruux oo shacab ahaa oo xiliga uu dhacayay qaraxa marayay wadada ayaa ku dhintay qaraxa,isla markaana waxaa ku dhaawacmay hal Askari ka tirsan Ciidanka Booliska Soomaaliya oo isna goobta socday.
Qaraxaan ayaa waxaa uu kusoo adayaa,iyadoo Maanta qarax loo adeegaday gaari laga soo buuxiyay waxyaabaha qaraxa uu ka dhacay Bar-koontarool oo ku taalla agagaarka Taalada Daljirka Daahsoon ee Degmada Boondheere ee Gobolka Banaadir gaar ahaan wadada aada dhinaca Xabsigii hore ee Godka Jilacoow,kaasi oo geystay Khasaaro isugu jira dhimasho iyo dhaawac.
