Iyadoo Maanta Magaalada Muqdisho lagu qabtay Munaasabad lagu xusayo qaraxii ka dhacay Isgoyska 14-ka October Ex Zoobe ayaa
waxaa goobta ay ka dhacday Munaasabadda
lagu arkay labo gaari oo ku xardhan yihiin sawirka Madaxweynaha iyo Ra’iisul Wasaaraha Soomaaliya.
Gaadiidka la arkay ee ku xardhanaa Sawirrada Madaxweyne Farmaajo iyo RW Xasan Cali Kheyrea ayaa ahaa kuwo laga qaaday iyagoo dhiig bixinaya labo sano ka hor Maanta oo kale,kuwaasi oo baraha Bulshada aad loo hadal haayay.
Hayeeshee Madaxtooyadda Soomaaliya ayaa war ka soo saartay Sawirada lagu arkay goobtii Maanta lagu qabtay Munaasabada qaraxii 14-ka October Ex Zoobe ee Muqdisho.
Agaasimaha Warfaafinta Madaxtooyadda Soomaaliya Cabdinuur Maxamed Axmed oo War qoraal ah soo dhigay bartiisa Facebook ayaa waxaa uu sheegay in shakhsiyaad loo heeso ama loo buraanburo ay tahay dhaqan duugoobay oo aan loo baahnayn.
“Madaxda iyo dadka kale ee ammaanada bulshada loo wakiishay waxa ay khaldaan waa la sixi karaa, waxa ay hagaajiyeenna waa la tilmaami karaa balse in shakhsiyaad loo heeso ama loo buraanburo waa dhaqan duugoobay oo aan loo baahnayn. Waxaa lamid ah qoladii maanta baabuurta kusoo buufisay sawirrada madaxda qaranka iyaga oo isu haysta in ay wax hagaajiyeen. Dhaqamadaas liita waa in la baabi’iyaa”ayuu yiri Agaasime Cabdinuur.
