Ku-simaha Guddoomiyaha Gobolka Banaadir ahna Guddoomiye Ku-xigeenka Maamulka iyo Maaliyadda Axmed Xasan Iimaan ayaa xalay soo kormeeray waddooyinka waa-weyn ee Magaalada Muqdisho kuwaasi oo maalmihii u danbeeyay saameyn ku yeeshay biyo-dhiga Roobabkii ka da’ay Muqdisho.
Wadooyinka uu booqday Ku-simaha ayaa waxa ay kala ahaayeen Wadada weyn ee xiriirisa Dekkada Muqdisho illaa KM4, Wadada Xiriirisa KM4 illaa Airporka Muqdisho, Wadada Ceel Qalow ee Degmada Wadajir iyo Wadada Daalo ee Degmada Howlwadaag.
Waddooyinkaas oo ah kuwo ku xirmay biyaha Roobkii ka da’ay Caasimadda dalka ayaa haatan waxaa dib ugu soo laabtay isu-socodkoodkii dadka iyo gaadiidka noocyadiisa kala duwan, waxaana qaarkood ku socdo shaqooyin biyaha looga qaadayo.
Afhayeenka Maamulka Gobolka Banaadir Saalax Xasan Cumar (Saalax Dheere) ayaa warbaahinta u sheegay in ka-sakow biyo qaadista ay Magaalada ka wadaan Maamulka Gobolka Banaadir, sidoo kale ay socoto in loo gurmado dadka danta yar ee dhibaatooyinka kasoo gaareen roobabkii ka da’ay Muqdisho.
Magaalada Muqdisho ayaa waxaa dhawaan ka da’ay roobab xoogan oo biyo farabadan dhigay waddooyin dhowr ah oo ku yaalla Caasimadda, waxaana taas ay saameyn xoogan ku yeelatay gaadiidka iyo dadka, xili gaadiidleyda ay isticmaalayeen waddooyin qardo-jeer oo dhex yaalla xaafadaha degmooyinka Gobolka Banaadir.