Madaxa Golaha Sare ee Dowladda Liibiya (HCS), Khaalid Al-Mishri waxa uu ku eedeeyey Dowladda Masar inay kaalun ku lahayd weerarkii Diyaaradaha ee waaberigii hore ee maanta oo Arbaco ah lagu qaaday Xarunta lagu hayo Muhaajiriinta ee Tojara ee Bariga caasimadda dalka Libiya ee Tripoli.
Qoraal uu Mas’uulkaasi soo dhigay Bartiisa Twitter-ka ayuu ku sheegay in Waddan haatan madax ka ah Ururka Midowga Afrika (oo uu ula jeeday Masar) inay tahay cidda ka mas’uulka ah duqeynta diyaaradaha ee lala beegsaday Muhaajiriinta Afrikaanka ee lagu hayo Xarunta Tajoora, kuna geeriyodeen in ka badan 40-qof, kuna dhaawacmeen in ka badan 130-kale.
Waxa uu intaasi ku daray inay waajib tahay inay Guddiga Xaqiiqo-raadin ee QM la xisaabtamaan dadkii geystay Dembigaasi.
Dhinaca kale, Golaha Sare ee Dowladda Liibiya (HCS) waxay soo saareen Hadal-qoraal oo ay ku cambaareeyeen weerarka ka dhacay Xarunta Tajoora ee lagu dilay 44 Muhaajiriin, laguna dhaawacay Tobaneeyo kale, waxayna ku eedeeyeen in Khaliifa Xaftar duqeyntaasi.
Golaha HCS waxay ugu baaqeen Hawlgalka QM ee Taageerida Nabadda dalka Liibiya ee UNSMIL inay Guddi Xaqiiqo-raadin ah soo diraan, si ay u eegaan Khasaaraha soo gaaray Nolosha Muhaajiriinta iyo Dhismihii hoyga u ahaa.
Goluhu waxay kaloo sheegeen inay la xiriireen Dowlado iyo Ururo si ay u arkaan Dembiilenimadda weerarkaasi oo wax u dhimi kara dadaalka dhabta ee ay Beesha Caalamka ku doonayaan in Dembiilayaasha Dagaalka ee dalka Liibiya la hor geeyo Garsoorka.
DAAWO MUUQAALKA DHACDADA NAXDINTA LEH EE DUQEYNTA LALA BEEGSADAY MUHAAJIRIINTA:
