In ka badan 270 Muhaajiriin ku sii jeeday Xeebaha Europe ayaa laga soo badbadiyey Xeebaha dalka Libiya, sida ay sheegeen Hay’adaha QM ee UNHCR iyo IOM.
Markab Ganacsi oo lagu magacabo VON TRITON oo watay Calanka Jibraltar ayaa soo badbaadiyey Muhaajiriintaasi, kadibna waxa uu ku wareejiyey Ciiddanka Ilaladda Xeebaha Libiya,oo iyagana u sii gudbiyey Xero lagu hayo Muhaajiriinta sharci la’aanta ku joogta dalkaasi.
Dhinaca kale, Hadal-qoraal oo ay Hay’adaha QM ugu qaabilsan Arrimaha Qaxootiga ee UNHCR iyo Hay’adda Muhaajiriinta Caalamiga ee IOM soo saareen Fiidnimadii xalay waxay mar kale ku celiyeen inaan cidna lagu soo celin karin dalka Libiya, kadib, marka laga badbaadiyo Badda.
Milkiilayaasha Markabka kama aysan jawaabin wicitaano wax looga weydiin lahaa Tallaabadda ay Boqolaalka Muhaajiriinta ee ay badbaadiyeen dib ugu celiyeen Libiya.
In ka badan 130,000 oo Muhaajiriin ah ayaa dib loogu celiyey Xerooyinka dadka lagu hayo ee Libiya, halka boqolaal kalena ku halaagmeen Badda.
