Xildhibaanada Golaha Shacabka Baarlamaanka Federaalka Soomaaliya ayaa Maanta oo sabti ah waxaa lagu wadaa in kulan ay ku yeeshaan Xarunta Villa Hargeysa ee Magaalada Muqdisho oo si KMG ay ugu shaqeeyaan.
Ajendaha kulanka Xildhibaanada ayaa waxaa uu yahay dhameystirka dooda xeerka Mataaladda Gobolka Banaadir ee Aqalka Sare oo maalmihii la soo dhaafay laga doodaya, iyagoo cod u qaadi doona xeerkaas.
Dhinaca kale Guddoomiyaha Guddiga Madaxa Banaan ee Doorashooyinka Qaranka Xaliimo Ismaaciil Xaliimo Yarey ayaa lagu wadaa in Maanta ay hortegto Xildhibaannada Golaha Shacabka ee Baarlamaanka Federaalka.
Guddoomiye Xaliimo Yarey ayaa Xildhibaanada Golaha ka hor jeedin doonta sida uu qorshahu yahay Warbixin ku saabsan doorashooyinka la filayo inay ka dhacaan dalka Soomaaliya dhamaadka sanadkaan 2020/2021.
Xildhibaanada Golaha Shacabka ayaa xalay waxaa loo diray farriimo ku aadan in Maanta uu jiro kulanka Golaha, isla markaana Munadayaasha laga doonayo inay kasoo qeyb galaan si loo dardar-geliyo howlaha horyaalla Baarlamaanka, iyagoona maalmihii lasoo dhaafay yeelanayay kulamo is-daba joog ah.
