Wararka aan ka heleyno Magaalada Garoowe ee Xarunta Gobolka Nugaal ayaa waxaa ay sheegayaan in halkaas xalay laga maqlay Dhawaqa rasaas xoogan oo ay isdhaafsanayeen Ciidamo ka tirsan kuwa Booliska Puntland iyo rag hubeysan.
Rag hubeysan oo la sheegay inay yihiin kuwa is aruursaday oo qaadka ka Ganacsada ayaa weerar ku qaaday Saldhig Ciidanka Puntland ay ku yihiin bartamaha Magaalada Garoowe, waxaana halkaas dagaal kooban uu ku dhexmaray Booliska iyo Dableyda.
Dad ku sugan Garoowe ayaa soo weriyay in labada dhinac ay rasaas xoogan isdhaafsanayeen muddo ku dhow 30 daqiiqado, hayeeshee markii dambe ragga hubeysan ay goobta ka baxsadeen, waxaana xaaladda ay ku soo noqotay mid caadi ah.
Saraakiisha Ciidanka amniga Puntland ee Garoowe ayaa xaqiijiyey in weerarkaas uusan geysan wax Khasaaro ah, xili warar soo baxayay ay sheegeen in dhaawacyo ay jiraan, balse wararkaas ayaa la beeniyay.
Ciidanka Ilaalada Madaxtooyada Puntland ayaa la geeyey Saldhiga iyo Taliska guud ee Booliska, kuwaasi oo la tilmaamay inay ku sugayaan amniga Xarumahaas.
Sidoo kale Saraakiisha ayaa sheegay in ay howlan yihiin sidii ay ammaanka u xaqiijin lahaayeen, waxayna sheegeen in ay Howlgal inay wadaan howlgalo kala duwan oo lagu soo qabanayo kooxihii weerarka geystay.
