Waxaa Magaalada Muqdisho gaar ahaan Xarunta Ciidanka Booliska Soomaaliyeed ee Jeneraal Kaahiye ka dhacday doorashada kursiga tirsigiisu yahay HOP#268 ee Golaha Shacabka Baarlamaanka 11-aad ee Gobolada Waqooyi ee Somaliland.
Doorashada kursiga HOP#268 ayaa waxaa uu qorshahu ahaa inay ku tartamaan Musharaxiinta Axmed Muumin Waaliye iyo Maxamed Cali Xagaa oo ah Wasiiru-dowlaha Wasaaradda Gaashaandhigga Xukuumadda Federaalka Soomaaliya ee xilgaarsiinta.
99 Ergo ayaa coddeeysay doorashada kursigaan oo uu ku guuleystay Maxamed Cali Xagaa oo loogu coddeeyay Cod gacan taag ah, kadib markii uu doorashada ka tanaasulay Musharax Xildhibaan Axmed Muumin Waaliye Ibraahim oo la tartami lahaa Xagaa.
Kursiga Hop268 ayaa waxaa dhowrkii sanno ee la soo dhaafay uu ku fadhiyo Wasiiru dowlaha Wasaaradda Gaashaandhigga Xukuumadda Federaalka ee xilgaarsiinta Maxamed Cali Xagaa oo mar labaad la doortay.
Doorashada kuraas kale oo kamid ah kuraasta Golaha Shacabka Baarlamaanka 11-aad ee Gobolada Waqooyi ee Somaliland ayaa haatan ka socota Magaalada Muqdisho gaar ahaan Xarunta Ciidanka Booliska Soomaaliyeed ee Jeneraal Kaahiye.
