Ciidamo ka tirsan kuwa maamulka Degmada Kaaraan ee Gobolka ayaa toogtay Askari ka tirsanaa Ciidamada,kaasi oo dilay Darawal Mooto Bajaajle ahaa.
Waxaa la sheegay in uu dilka kahor muran dhex maray askariga iyo darawalka bajaajlaha ah ee la dilay,isla markaana askariga uu xabad Madaxa kaga dhuftay.
Askariga dilka u geystay Darawalka mooto Bajaajle ahaa ayaa isku dayay in uu baxsado,isla markaana waxa uu galay Guri ku yaalla Xaafadda Faanoole ee Degmada Kaaraan ee Gobolka Banaadir.
Ciidamo ka tirsan maamulka Degmada Kaaraan ayaa tegay gurigii uu galay askariga hubeysnaa,iyagoona ugu dambeyn guriga dhexdiisa ku toogay gacan ku dhiiglaha.
Guddoomiyaha Degmada Kaaraan ee Gobolka Banaadir Cabdifitaax Xaaji Nuur ayaa Idaacada Dalsan u xaqiijiyay in la toogay Askarigii maanta dilka u geystay Darawal Mooto Bajaajle ahaa.
Meydka Darawalka Mooto bajaajle ahaa ayaa waxaa loo qaaday Xarunta Hay’adda Dambe baarinta ee CID-da ee Magaalada Muqdisho.
Dilalka loo geysanayo Darawalada mooto bajaajta ayaa mar walba waxa ay ka dhacaan Muqdisho iyo qaar ka mid ah gobolada dalka Soomaaliya.
