Xoghayaha Guud ee QM, Antonio Guterres waxa uu si kulul u cambaareeyey weeraradii Alshabaab ee dhimashadad geystay ee ka dhacay Magaalladda Muqdisho.
Istefane Dujarik oo ah Afhayeenka Xoghayaha Guud ee QM ayaa sheegay inuu Antonio Guterres sheegay inaysan falalkaasi oo kale wax u dhimi doonin dadaalka loogu jiro Nabadda iyo Barwaaqadda Somalia ee mustaqbalka, waa sida uu hadalka u yiri.
Waxa kale oo uu mar kale ku celiyey Taageeradda iyo Isgarab istaagga QM ee Ummadda iyo DFS ee xilligan adag, wuxuuna u tacsideeyey dhamaan qoysaska iyo saaxiibadda Dhibanayaashii ku geeriyooday weeraradaasi, isagoo dhanka kale dadkii ku dhaawacmay u rajeeyey bogsasho degdeg ah.
Sidoo kale, Hawlgalka QM ee Taageeradda Somalia (UNSOM) waxay si kulul u cambaareeyen qaraxyadii mataanaha iyo weeraradii Alshabaab habeenkii Jimcaha ka geysteen magaalladda Muqdisho.
Qoraal ay Bartooda Twitter-ka soo dhigeen waxay ku sheegeen inaysan Ajendo Siyaasadeed ku shaqeyn karin colaadaha Xag-jirnimadda, waa sida ay hadalka u dhigeen.
Dhinaca kale, Dowladda Turkiga ayaa ka mid ah Dowladaha cambaareeyey weeraradii Alshabaab, waxayna sheegeen inay ka xun yihiin weeraradaasi oo ay dad badan ku naf waayeen, kuwo kalena ku dhaawacmeen.
Qoraal ka soo baxay Wasaaradda Arrimaha Dibedda ee Turkiga ayaa lagu sheegay inay si xooggan u cambaaraynayaan falkaasi, waxayna u tacsideeyeen DFS iyo Qoysaska ay dadka kaga geeriyoodeen, iyagoo caafimaad degdeg ah u rajeeyey dadkii ku dhaawacmay.
Dowladda Qatar ayaa ka mid ah Dalalka sida kulul u cambaareeyey Weeraradaasi, waxayna DFS iyo shacabka Soomaaliyeed uga tacsideeyeen dadkii ku geeriyooday qaraxyadaasi, iyadoo kuwii dhaawacmay u rajeeyey caafimaad qab iyo inay ka soo bogsadaan dhaawacyadda soo gaaray.
