Guddoomiyaha Golaha Shacabka ee JFS Mudane Maxamed Mursal Sheekh Cabdiraxmaan ayaa Marka hore guud ahaan shacabka Soomaaliyeed uga tacsiyadeeyay dadkii ku shahiiday weerarkii Al-shabaab ay ku qaadeen goobo isugu jira ganacsi,meelo ay dadka isugu yimaadaan iyo guryo ay dad shacabka ah degan yihiin,wuxuuna Caafimaad deg deg ah Alle ugu baryay dadkii ay dhaawacyadu soo gaareen.
“Innaa lillaah wa innaa ileeehi raajicuun Marka hore intii nabad diidku ay halkaasi ku xasuuqeen Allaha ha u naxriisto Sidoo kale intii uu dhaawaca soo gaarayna Caafimaad ah taam ah Allaha ha siiyo,Waan cambareynayaa weerarkaasi oo ah mid muujinaya baaxada ay la egtahay cadowtinimada nabad diidka ay u qabaan shacabka Soomaaliyeed”
Guddoomiyaha Golaha shacabka ayaa ku amaanay Ciidanka Qaranka Soomaaliyeed sida taxadarka leh ee ay usoo gaba gabeeyeen howlgalkaasi saacadaha badan qaatay kaasoo ugu dambeyn Geesiyaasha Qaranka ku guuleystay in dilaan ragii weerarka soo qaaday Sidoo kalena ay soo badbaadiyaan dadkii masaakiinta ahaa ee uu guryahooda ku qabsaday.
“Waxaan u mahad celinayaa Ciidankeena Amaanka oo soo badbaadiyay shacabkii maleeshiyaadka ay guryahooda ku qabsadeen Sidoo kale halkaasi ku laayay kooxihii nabad diidka ahaa ee weerarka soo qaaday,waxaana ciidanka ku amaanayaa dadaalka ay ugu jiraan cirib tirka kooxaha argagixisada ah”
Ugu dambeyn waxa uu shacabka Soomaaliyeed ugu baaqay in ay ciidanka Amaanka kala dhaqeeyaan sugida amaanka iyo la dagaalanka Al-shabaab.
