Waxaa xalay fiidkii Isgoyska Sanca ee Magaalada Muqdisho Askari ka tirsan Ciidanka dowlada Soomaaliya uu ku dilay Darawal Mooto Bajaajle ahaa.
Dad goobjoogayaal ah oo la hadlya Dalsan ayaa waxa ay u sheegeen in dilka uu ka dhacay Bartamaha Isgoyska,isla markaana askariga uu si bareer ah u dilay Darawalka bajaajle ahaa xili halkaasi uu ku sugnaa.
Sidoo kale waxaa la shgeegay in Askariga dilka geystay iyo Darawalka muran uu soo kala dhexgalay inta uusan falka dhicin,hayeeshee markii dambe uu rasaas ku dhuftay,isagoona durbo goobta ku geeriyooday.
Dhinaca kale qaar kamid ah Darawalada Mooto Bajaajta ee ka shaqeeysa gudaha Magaalada Muqdisho ayaa xalay banaanbax looga soo horjeedo dilkii loo geystay Darawalkii Bajaajle ahaa ka dhigay Isgoyska Sanca ee Muqdisho.
Askarigii ka tirsanaa Ciidanka dowlada Soomaaliya dilka u geystay Mooto bajaajlaha ayaa la sheegay in si deg deg ah uu goobta uga baxday.
Magaalada Muqdisho ayaa waxaa muddooyinkii dambe ku soo badanayay dilalka loo geysanayo Darawalada Mooto Bajaajta,kuwaasi oo inta badan ay geystaan Askarta ka tirsan Ciidamada dowlada Soomaaliya.
