Maalik Caalim Jones oo 31-jir ah ayaa shalay la soo taagay Maxkamadda Federalka ee Manhattan, waxaana lagu soo oogay 5 fal-dembiyeed ay ka mid ahaayeen inuu tababar la soo qaatay Alshabaab iyo inuu ku taageeray Alshabaab dagaalka ay kula jiraan Dowladda Somalia iyo Hawlgalka AMISOM.
Dukumenti la hor keenay Maxkamadda, ayaa lagu sheegay in Maalik Caalim Jones oo ah Muwaadin Maraykan ku dhashay Gobalka Maryland u sheegay xubno ka tirsan Dambi-baarista FBI-da inuu la dagaalamayey Ciiddanka Kenya tan iyo markii uu ku dhaawacmay duqeyn Gantaal, lana dhigay Isbitaalka.
Maalik Caalim Jones waxa uu FBI-da u sheegay inuu Alshabaab ka tirsanaa muddadii u dhexeysay bishii August ee sannadkii 2011-kii ilaa bishii December ee sannadkii hore ee 2015-ka.
FBI-da waxay sheegtay inay hayaan caddaymo muujinaya Dembiyadda lagu soo oogayo Maalik Caalim Jones, oo ay ku jiraan Muuqaal Video oo muujinaya isagoo ka barbar dagaalamayo Alshabaab.
Dhinaca kale, Garyaqaan Maalik Caalim Jones oo lagu magacaabo Irving Cohen ayaa Suxufiyiinta ugu sheegay bannaanka Maxkmaadda Manhattan inuu dib u eegayo caddaymaha la soo bandhiga, isla markaana ay iska difaaci doonaan Eedeymahaasi.
Maalik Caalim Jones oo bishii December 7-dii lagu qabtay magaalladda Baraawe, isagoo dooni u sii raaci lahaa Yemen ayaa lagu sii hayn doonaa Xabsiga.
©Radio Dalsan        Â
