Safaaradda Mareykanka ee Soomaaliya ayaa War kasoo saartay Baaqii Guddiga Joogtada Aqalka Sare ee dalka ee ahaa in dowladda Federaalka iyo dowlad Goboleedyada isugu yimaadan Shir Deg Deg ah si loo wada-hadlo.
War-saxaafadeed kasoo baxay Safaaradda Mareykanka ayaa waxaa lagu soo dhaweeyay hadaladka ka soo yeeray Aqalka Sare, Madaxweynaha Hirshabeelle Maxamed Cabdi, Madaxweynaha Puntland iyo Madaxweynaha Jubbaland , iyo daneeyayaasha ee siyaasadda ee ku aadan wada hadal dhex mara dowladda Federaalka iyo dowlad goboleedyada, si waafaqsan dastuurka Soomaaliya.
Sidoo kale Mareykanka ayaa Madaxda dowladda Federaalka iyo dowlad Goboleedyada ugu baaqay inay muujiyaan hogaan geesinimo leh iyagoo meel iska dhigaya kaladuwanaashaha si loogu heshiiyo hanaan Doorasho oo waqtigeeda ku dhacda.
“Madaxda DFS iyo M/Goboleedyada waa inay muujiyaan hogaan geesinimo leh iyagoo meel iska dhigaya kaladuwanaashaha si loogu heshiiyo qaab waqtigeedii ku haboon, loo dhan yahay oo hufan oo loogu talagalay doorashooyinka qaran; xallinta kala-qaybsanaanta siyaasadeed u midoobaan la dagaallanka Al-Shabaab in dib loo eego Qorshaha Kala-guurka Soomaaliya” ayaa lagu yiri Qoraalka Safaaradda Mareykanka.
Ugu dambeyn Qoraalka ayaa waxaa lagu sheegay in Dowladda Mareykanka ay go’an inay taageerto dadka Soomaaliyeed oo ay ka go’an tahay inay horumariso hadafyadayada iyo himilooyin mustaqbalka Soomaaliya.
