Haweeneyda Wasiirka Arrimaha Dibedda ka ah Kenya, Amina Mohamed Jibril ayaa hadalkaasi ku sheegtay Wareysi ay siiyey Barnaamijka UpFront ee Telefishinka Aljazeera ee Xaruntiisa Dhexe ku taallo caasimadda dalka Qatar ee Doha.
Mar wax laga weydiiyey Dagaalka weli socda ee ay Dagaalamayaasha Xarakadda Alshabaab ka geystaan gudaha Kenya, waxay ku jawaabtay: “Waan ku guuleysanaynaa Dagaalka ka socda gudaha Kenya†waa sida ay hadalka u tiri.
Hadalkeeda ayaa u muuqda mid ka fog Xaqiiqda, iyadoo ay Dagaalamayaasha Alshabaab weli Hawlgallo ka fuliyaan gudaha Kenya, ee ay kaga horjeedaan Ciiddanka Kenya ee ku sugan gudaha Somalia.
Weerarkii ugu dambeeyey ee ay Dagaalamayaasha Alshabaab ka geystaan gudaha Kenya ayaa ahaa weerarkii ay Waaberigii hore ee Khamiistii shalay ka geysteen magaalladda Mandera ee W/bari Kenya.
Afhayeenka Xarakadda Alshabaab ugu qaabilsan Hawlgalladda Milliteri, Sheekh C/casiis Abu Muscab ayaa sheegay in ay Weerarkaasi ku dileen 6 qof oo Kirishtaan ah, kuna gubeen Gaari ay Boliska Kenya lahaayeen.
Dhinaca kale, Amina Mohamed ayaa wax laga weydiiyey Dib-u-celinta Qaxootiga Soomaalida, Eedeymaha Musuqa harreeyeen Dowladda Kenya iyo Tacadiyadda loo geysto Dadka Soomaalida ee laga tirada badan yahay.
Waxay Wareysiga ay siisay Barnaamijka UpFront ee Aljazeera TV ku beenisay in dadka Soomaalida ee lala xiriirnayo inay taageersan yihiin Xarakadda Alshabaab loo geysto Xarig, Jir-dil iyo in Dhibanayaasha qaarkooda la waayey raqdooda iyo ruuxooda.
Waxay ku dooday inaysan waxba ka jirin wararka ay Waaxda Arrimaha Dibedda Maraykanka iyo Hay’adda u dooda Xuquuqda Aadanaha ee Human Rights Watch ku xaqiijiyeen inay sii kordheen Tacadiyadda ay Hay’addaha Ammaanka Kenya u geystaan Soomaalida ku nool W/bari Kenya.
Mar wax lag weydiiyey Tallaabadda ay Dowladda Kenya dib ugu celinayso Qaxootiga Soomaalida waqtiga dheer ku noolaa Xeradda Dhadhaab, waxay sheegtay inaysan ku xadgudbin Xuquuqda Qaxootiga iyo Qawaaniinta Caalamka.
“Haddii aan Qaxootiga ku xadgudubno, Caalamka oo idil ayaa hoos imaan lahaa oo sidii Hal Tan oo Bulkeeti ah madaxa nooga soo dhici lahaa†ayey tiri Wasiirka Arrimaha Dibedda Kenya oo intaasi ku dartay inay Heshiis 3 Geesood la galeen Dowladda Federalka Somalia iyo Hay’adda UNBHCR sannadkii 2013kii.
Wasiirka Arrimaha Dibedda ka ah Kenya, Amina Mohamed Jibril waxaa kaloo beenisay Eedeymaha la xiriira Musuqa ka jira Dowladda Kenya, inkastoo uu Hanti-dhowraha Guud ee dalkaasi sheegay in la la’ yahay 2 BILLION oo Dollar oo loogu tala-galay Kaalmadda Dadweynaha.
Si kastaba ha ahaatee, Telefishinka Aljazeera ayaa la filayaa inay caawa saacadda markay tahay 10-ka iyo Barka Fiidnimo (19:30 GMT) baahiyaan Wareysiga Khaaska ee ay Haweeneyda Wasiirka Arrimaha Dibedda ka ah dalka Kenya, Amina Mohamed Jibril siisay Barnaamijka UpFront ee Aljazeera TV .
