Danjirihii hore ee Somalia uga wakiilka ah dalka Senigal, Ambassador Maxamed Xuseen Awliyo ayaa si mutuxan ugu dhaliilay Madaxweyne Xasan Sheekh Maxamuud inuu hagar-daamo ku hayo Ururka Ahlu Suna Wal-jameeca ee Goballadda Dhexe.
Isagoo Suxufiyiinta kula hadlayey caasimadda dalka Uganda ee Kampala, waxa uu carrabka ku dhuftay inaysan ahayn markii ugu horreysay ee uu Madaxweynaha DFS ku eedeeyo inuusan si xaq ah ku maamulin Ummadda Soomaaliyeed.
Waxa uu intaasi ku daray inuu Madaxweyne Xasan Sheekh Maxamuud hagardaamo iyo gacan bidixeyn xaq-darro ah kula dhaqmo Ahlu-sunna, isla markaana uu Faragelin ka dhex wado Maamul-u-samaynta Goballadda Dhexe.
Danjire Awliyo, waxa uu ugu baaqay Madaxweynaha inuu ka waantoobo arrimahaasi iyo inuu caddaalad ku maamulo Ummadda Soomaaliyeed, wuxuuna ku goodiyey inuu Kacdoon la mid ah kan ka dhacay Dhuusamareeb oo kale ka dhici doono magaalladda Muqdisho, waa sida uu hadalka u yiri.
Mas’uulkaasi waxa uu xilka Danjirenimo ee uu haatan  ku magacaaban yahay waxa uu ka helay Saami-qeybsigii Urur-diimeedka Ahlu Sunna Wal-jameeca ka soo gaaray Heshiiskii Awood-qeybsiga ee ay la galeen Dowladdii KMG ee uu Madaxweynuhu ka ahaa Sheekh Shariif Sheekh Axmed.
© Warqabadka Radio Dalsan
