Murashax Madaxweyne C/raxmaan Sheekh Maxamed Faroole ayaa ku dhawaaqay inuu ka tanaasulay Doorashadda Madaxweynaha JFS oo lagu wado in berri loo codeeyo.
C/raxmaan Faroole oo Shir Jaraa’id ku qabtay Muqdisho waxa uu ku baaqay in la yareeyo tirada Murashixiinta ee aadka u badan.
Siyaasiga C/raxmaan Faroole oo mar soo noqday Madaxweynaha Maamul-gobaleedka Puntland ayaa hadalkaasi ku dhawaaqay, kadib, markii uu xalay Kulan-wadareed la yeeshay qaar ka mid ah Murashixiinta ugu miisaanka culus ee Doorashadda Madaxtinimadda.
Waa Murashixii 2-aad ee ku dhawaaqa inuu ka tanaasulay Doorashada Madaxtinimadda JFS.
Ma cadda sababaha rasmiga ee uu Murashaxa u tanaasulay, balse, ilo lagu kalsoon yahay ayaa waxay sheegayaan inuu u tanaasulay Murashax Madaxweyne Sheekh Shariif oo ay Isbahaysi dhow leeyihiin.
Xalay ayey ahayd, markii ay 20 Murashax Madaxweyne sheegeen inay samaysteen Isbahaysi si uu mid ka mid ah Murashixiinta loogu taageero inuu ku guuleysto Doorashadda Madaxweynaha.
Murashixiintaasi Isbahaysiga yeeshay ayaa shaaciyey inay doonayaan Isbedel cusub oo ku yimaada Madaxtinimadda Somalia.
Si kastaba ha ahaatee, Madaxweyne Xasan Sheekh Maxamuud ayaan ka mid ahayn Isbahaysiga ay ku mideysan yihiin 20-ka Murashax.
©Radio Dalsan
