Wararka aan ka heleyno Magaalada Boosaaso ee Xarunta Gobolka Bari ayaa waxaa ay sheegayaan in halkaas goob Keyd Shidaal ah oo ku taalla uu xiligaan ka socdo dab xoogan.
Dabkaas ayaa goobta uu socdo waxaa ay sigaar ah uga tiran tahay xaafadda Hilaac ee Boosaaso, waxaana la sheegay in dabka uu markii hore qabsaday Booyad, balse markii dambe uu kusii faafay goobta Keydka shidaalka ah.
Dadka deegaanka ayaa soo sheegaya in dabkaas uu socdo muddo 40 daqiiqo ah, isla markaana ay goobta ay gaareen gaadiidka dab demiska ee shirkaddaha iyo dadweyne farabadan oo ka qeyb qaadanaya howlaha Gurmadka ah ee halkaas ka socda.
Qiiq iyo uuro madow ayaa hawada isku shareertay, taasi oo ka baxeysa halka uu ka socdo dabka, sida lagu arkayay Sawirro laga soo qaaday goobta lagu faafiyay baraha Bulshada.
Warar hordhac ayaa sheegaya in dabkaas uu geystay Khasaaro dhaawac oo ay waxyeelo kasoo gaartay laba ruux, halka sidoo kalena uu jiro Khasaaro hantiyadeed oo badan, waxaana aad loo adkeeyay amniga goobta oo la geeyay Ciidamo ka tirsan Puntland.