Wakiilada Beesha Caalamka ayaa sheegay inay ka welwelsan yihiin khilaafka xoogan ee u dhexeeya Madaxweyne Maxamed Cabdullaahi Farmaajo iyo Ra’iisul Wasaare Rooble ee aan weli la xalin, kaasi salka ku haaya kiiska Ikraan Tahliil Faarax iyo awoodaha sharciga.
War-saxaafadeed kasoo baxay Beesha Caalamka ayaa waxaa Madaxweyne Farmaajo iyo Rooble loogu booriyey in sida ugu dhaqsaha badan u gaaraan heshiis, si ay diiradda u saaraan hirgelinta heshiisyada doorashada ee horey loo gaaray.
Wakiilada ayaa Madaxda ka dalbaday inay hubiyaan in hay’adaha amniga ee muhiimka ah sida Wasaaradda amniga iyo Taliska hay’adda Nabadsugida iyo Sirdoonka Qaranka ee NISA ay u dhiibaan hoggaamiyeyaal awood u leh oo la qadariyo, gaar ahaan xilliga doorashada.
“Saaxiibada caalamku waxay ku boorrinayaan Madaxweynaha iyo Ra’iisul Wasaaraha inay sida ugu dhaqsaha badan u gaaraan heshiis, si ay diiradda u saaraan hirgelinta heshiisyada doorashada ee 17-kii Sebteember 2020 iyo 27-kii Maajo 2021 iyo inay hubiyaan in hay’adaha amniga ee muhiimka ah (WAG iyo NISA) ay madax u yihiin hoggaamiyeyaal awood u leh oo la qadariyo, gaar ahaan xilliga doorashada†ayaa lagu yiri Qoraalka.
Sidoo kale Beesha Caalamka ayaa tilmaamtay in Hubaal la’aanta siyaasadeed ee socota ay sii kordhisay halista dib-u-dhac kale oo ku yimaada geeddi-socodka doorashada, taasi oo ay sheegeen inay horseedday jahwareer ka dhashay hoggaanka Wasaaradda Amniga iyo Taliska NISA, kuwaas oo waxtarkoodu muhiim u yahay la-dagaallanka Al-Shabaab.
War-saxaafadeedka Wakiilada Beesha Caalamka ayaa waxaa si wadajir ah u soo saaray: Hawlgalka Midowga Afrika ee Soomaaliya (AMISOM), Canada, Denmark, Egypt, Itoobiya, Midowga Yurub (EU), Finland, Jarmalka, Urur-Goboleedka (IGAD), Ireland, Talyaaniga, Kenya, Jaamacadda Carabta, Netherland, Norway, Qadar, Saudi Arabia, Sudan, Iswiidhan, Swisarlandh, Turkey, Boqortooyada Ingiriiska, Dowladda Maraykanka, Qaramada Midoobay.
