Shalay muqdisho waxaa dib ugu soo laabtay Xulka 17-jirada dalkeena Soomaaliya oo kaalinta labaad kas oo galay tartankii bariga & Bartamaha Afrika ee ka socday dalka Burundi,waxana Muqdisho loogu soo dhaweeyey si wanaagsan.
Baraha Bulshada ay isticmaasho ayaa waxaa lagu baahinayey Xulka 17-jirada oo Mooto bajaaj ku aadaya xaafadahooda taas oo dad badan oo isugu jira Madax ka tirsan dowladda iyo Shacab intaba ka carey siisay.
Kabtanka Xulka 17-jirada dalkeena Soomaaliya Cali Maxamuud Xasan (Cali Xabad) oo Wareysi siiyey Radio Dalsan ayaa ka sheekeeyey qaabkii loo soo dhaweeyey iyo waliba waxyaabaha keenay in Mooto bajaaj ay Xaafadahooda ku tagaan.
Waxa uu sheegay in Garoonka Aadan-Cadde si wanaagsan loogu soo dhaweeyey sidoo kalena intii ay ku sugnaayeen dalka Burundi dhinac walba laga dhiiragelinayay,isla markaana uu ugu mahad celiyey dowladda iyo Shacabka intaba.
Waxa uu sidoo kale sheegay in isaga Hooygiisa uu iminka uu ku sugan yahay,isla markaana Garoonka ay ka soo qaadeen dhalinyaro asxaabtiisa ah oo markii hore loo diyaariyay, waxa uuna dacaayad uu ku tilmaamay in guryahooda ay ku tageen Mooto Bajaaj.
Sidoo kale waxa uu sheegay in mid ka mid ah Hotelada Muqdisho Qado loogu sameeyey,qado kadibna ay eheladooda u yimaadeen sidaasna ay ku raaceen,isla markaana lagu wargeliyey in Xaflad loo qaban doono sidaasna ay isugu imaan doonaan.
Sikastaba guddoomiyaha Gobolka Banaadir ahna Duqa Muqdisho Eng,Cabdiraxmaan Cumar Cismaan Yariisow ayaa shalay sheegay in uu aad uga xun yahay in Ciyaartoydii Xulka Qaranka ay xaafadahooda Bajaaj ku tagaan,isla markaana ay baaritaan ku sameyn doonaan ciddii ka dambeysay.
Hoos Ka Dhageyso Wareysiga oo dhameystiran.
