Dalladda ay ku mideysan yihiin Ganacsatada Waratada ee Suuqa Islii ee magaalladda Nairobi ayaa gaashaanka ku dhuftay Eedeymo ay u soo jeediyeen Ganacsatada leh Dhismayaasha laga Dukaamaysto ee Shopping Mall.
Waratada waxay ku eedeeyeen Milkiilayaasha Dhismayaasha laga dukaamaysto inay boobayaan Dhulkii Dowladda, isla markaana ay doonayaan inay Maamulka Nairobi u saxiixaan Dhul-ballaarsiga.
Guddoomiyaha Ganacsatada Waratada Suuqa Islii, Jeff Oteba waxa uu sheegay inaysan haysanin goob ay ku ganacsadaan, oo aan ka ahayn Dhismayaasha laga dukaamsya hortooda.
Waxa uu Milkiilayaasha Dhismayaasha Ganacsiga ku eedeeyey inay Dhismooyin waa weyn ka dhisteen Dhulkii ay Dowladda u qoondeeysay Adeegyada kale.
Hadalkiisa ayaa soo baxay, hal maalin kadib markii ay Milkiilayaasha ilaa 45 Dhismayaasha Ganacsiga ee Suuqa Islii xireen goobahooda Ganacsiga, iyagoo ka cabanaya Waratada ciriiriga ka dhigtay Albaabada laga galo Dhismayaasha laga Dukaamaysto.
Guddoomiyaha Ganacsatada Suuqa Islii, Ibrahim Xuseen ayaaa sheegay in ku-dhawaad 20 kun oo Ganacsato Warato ku hor ganacsadaan Dhismayaasha laga dukaamaysto, isla markaana xireen Albaabadda laga geli lahaa Dhismayaasha Ganacsiga.
Waxa uu intaasi ku daray inay Ganacsatada Dhismayaasha laga dukaamaysto go’aansadeen in Ganacsigooda xiraan maalmaha Arbacadda ilaa Jimcaha ee Toddobaad kasta.
©Radio Dalsan
