Magaalada Kismaayo ee Caasimadda KMG-ka ah ee Maamulka Jubbaland ayaa waxaa Maanta mar kale halkaas gaaray wafdi ka socda Guddiga hirgelinta doorashooyinka heer Federaal oo ka baxay Magaalada Muqdisho.
Wafdiga Guddiga iyo xubno la socday ayaa waxaa Garoonka diyaaradaha Kismaayo kusoo dhaweeyay Guddiga hirgelinta doorashooyinka Jubbaland iyo Mas’uuliyiin kale, kuwaasi oo loo galbiyay dhinaca Xarunta Madaxtooyada.
Guddigaan doorashooyinka heer Federaal ayaa waxaa ay kulamo kala duwan la qaadan doonan qaybaha kala duwan ee ururada bulshada rayidka Jubbaland iyo Madaxda maamulka, iyagoona kala hadli doona doorashada.
Shalay ayaa waxaa Magaalada Kismaayo ee Xarunta Gobolka Jubbada Hoose gaaray Guddoomiyaha Guddiga doorashooyinka Maxamed Xasan Cirro iyo wafdi uu hoggaaminayay, isla markaana halkaas ka wada dardar-gelinta doorashada Aqalka Sare.
Doorashada Aqalka Sare ee Baarlamaanka oo Maanta lagu waday inay ka bilaabato dalka ayaa waxaa markii saddexaad ku yimid dib u dhac, waxaana Maamulka Jubbaland uu hadda wadaan diyaar garoow ku aadan doorashada.