Guddoomiyaha Xisbiga Midnimada iyo Dimuqraadiyadda, Md. Salaad Cali Jeelle ayaa waxa uu sheegay in wax laga xumaado tahay Dagaalka maalmihii la soo dhaafay ka dhacay magaallo-madaxda Gobalka Mudug ee Gaalkacayo.
Guddoomiyaha oo la hadlay Radio Dalsan ayaa ugu baaqay Madaxda Dowlad-gobaleedyadda Galmudug iyo Puntland inay joojiyaan colaadda, isla markaana ay Wada-xaajood ku xaliyaan Khilaafka Taagan.
“Soomaalida wey ka soo daashay Colaad, umana hamuun qabaa in mar kale la daadiyo dhiig sokeeye, waana inuu Caqliga taliyaa” ayuu yiri Md. Salaad Cali Jeelle, oo mar soo noqday Wasiir-ku-xigeenka Gaashaandhigga ee Dowladdii KMG ee Madaxweyne Marxuum C/llaahi Yuusuf Axmed.
Guddoomiyaha Xisbiga Midnimada iyo Dimuqraadiyadda waxa uu farta ku fiiqay inay jiraan Shaqsiyaad ujeedo Siyaasadeed ka leh Dagaalka Galkacayo, wuxuuna ugu baaqay Siyaasiyiinta labada dhinac inay u turaan dadka rayidka, lagana joojiyo dagaalka sababay dhimashadda, dhaawaca iyo Barakaca Baahsan.
Dhanka kale, Md. Salaad Cali Jeelle waxa uu soo dhaweeyey Guddiga Dowladda Federalka u magacowday Dhexdhexaadinta ee Maamulladda Puntland iyo Galmudug, wuxuuna dadka Reer Gaalkacayo ku booriyey inay ka wada shaqeeyaan Nabadda iyo Walaaltinimadda, wixii Khilaaf ahna lagu xaliyo Miiska Nabadda.
© Radio Dalsan
