Guddoomiyaha Midowga Musharaiinta xilka Madaxweynaha Soomaaliya Sheekh Shariif Sh Axmed oo labadii maalin ee lasoo dhaafay ku maqnaa Magaalada Baydhabo ayaa dib ugu laabtay Muqdisho, isagoo halkaas u tegay arrimo la xiriira ololihiisa Doorashada.
Inta uu ku sugnaa Baydhabo Madaxweynihii hore ee dalka ayaa waxaa kulan looga hadlay arrimo kala duwan uu la qaatay Madaxweynaha Maamulka Koonfur Galbeed Cabdicaiis Xasan Maxamed Lafta-gareen iyo Odayaasha dhaqanka Magaalada.
Sheekh Shariif ayaa Odayaasha kala hadlay sidii ay uga qeyb qaadan lahaayeen doorashada dalka ka dhaceysa, isla markaana u soo xuli lahaayeen Xildhibaano wax badan ka bedeli doona marxalada xiligaan uu dalku ku jiro.
Dhinaca kale Shariifka oo markii uu saaray Caasimadda dalka ee Muqdisho la hadlay warbaahinta ayaa u mahadceliyay dhammaan Madaxda Koonfur Galbeed, Odayaasha dhaqanka iyo qeybaha kala duwan ee soo dhaweynta u sameeyay markii uu gaaray halkaas.
Ugu dambeyn Sheekh Shariif ayaa tacsi u diray dhammaan qoyska dadkii dhalinyrada ahaa ee xalay ku geeriyooday qaraxii ka dhacay Maqaayada Gelato Divino oo ku taalla meel ku dhow Guriga uu degan yahay Shariifka, una dhow Garoonka diyaardaha Aadan Cadde, isagoo kuwii dhaawacmay u rajeeyay inuu Alle Caafimaad siiyo.
