Nin Somali oo lagu magacaabo Hashi Omar Hassan ayaa ah qofka keliya ee haatan u xiran dilkii loo geystay Saxafiyad u dhalatay dalka Talyaaniga oo la oran jirey Ilaria Alpi oo iyada iyo Sawir-qaadaheeda Miran Hrovatin, kuwaasi oo sannadkii 1994-kii lagu dilay bartamaha magaalladda Muqdisho.
Saxafiga iyo Sawir-qaadaha waxay u shaqeyn jireen Kanaalka 3-aad ee Telefishinka RAI ee dalka Talyaaniga
Sida laga soo xigtay Diplomaasi Talyaani oo lagu magacaabo Giuseppe Cassini oo baaritaanka Kiiskaasi ka soo sameeyey gudaha Somalia waxa uu sheegay in Dareewalka oo ah Markhaatiga muhiimka samaynayo wax kasta oo uu kaga badbaadi karo Dacwad-oogayaasha Maxkamadda.
Wargeyska La Republica ee ka soo baxa dalka Talyaaniga ayaa shalay daabacay in Caddaynta markhaatinimadda ee Diplomaasiga inay Maxkamadda si qarsoodi ah u qaadeen.
Bishii Janaayo ee sannadkan, Maxkamad ku taalla magaalladda Preugia waxay oggolaatay Codsi ka soo gaaray Qareenka oo ahaa in dib loo furo Dacwadda loo haysto Muwaadinka Soomaalida ee Hashi Omar Hassan.
Kooxda Qareenka waxay doonayaan in la cafiyo Hashi Omar Hassan oo isaga bishii june ee sannadkii hore laga sii daayey Xabsiga, kadib, markii uu soo dhamaystay xabsi 16 sanno oo ka mid ahaa Xukun 26-sanno oo horey loogu riday dilka Saxafiyad u dhalatay dalka Talyaaniga ee Ilaria Alpi iyada iyo Sawir-qaadaheeda Miran Hrovatin.
Sidoo kale, Qareenadda waxay ku doodayaan inuusan Hashi Omar Hassan joogin Muqdisho markii uu dilkaasi dhacayey, isla markaana si khiyaano leh loogu soo kaceeyey dalka Talyaaniga.
Bishii Feberaayo ee sannadkii hore, Ahmed Cali Raage oo ah Markhaatiga muhiimka ee Kiiskaasi ayaa sheegay inuu Hashi Omar Hassan yahay nin aan wax dembi ah gelin.
Ahmed Ali Raage oo u waramay Kanaalka 3-aad ee Telefishinka RAI, waxa uu sheegay in laga codsaday inuu si been ah ugu markhaati furo Hashi Omar Hassan oo isaga ku eedeysan dilka Saxfiyadda Ilaria Alpi iyada iyo Sawir-qaadaheeda Miran Hrovatin.
“Anigu ma arkin qofka rasaasta ku furay Suxufiyiinta†ayuu yiri Ahmed Ali Rage oo ka laabtay Markhaati ahaanta uu horey ugu caddeeyey Hashi inuu ahaa qofka ka dambeeyey dilkaasi.
Saxfiyadda Ilari Alpi oo 32 jir ahayd iyo Miran Hrovatin oo 45 jir ahaa waxaa magaalladda Muqdisho lagu dilay bishii March 25-dii ee sannadkii 1994-kii, kadib, markii ay jidka u galeen 7 nin oo hubeysan.
Waxaa kaloo loo maleynayaa inay Suxufiyiintaasi lagu dilay iska horimaad dhex maray Ciiddankii Nabad-ilaalinta Talyaaniga iyo Maleeshiyaddii Hoggaamiye-kooxeed Soomaali bishii March 25-dii ee sannadkii 1994-kii.
Dhinaca kale, Buug ay Waalidka Saxfiyadda Ilari Alpi qoreen sannadkii 1991-kii waxay ku sheegeen inuu dilkaasi la xiriiray Baaritaan ay Saxafiyadda iyo Sawir-qaadaha ku samaynayeen Hubka Qarsoodiga ee loo soo diri jirey Somalia ee lagu beddelan jirey Wasaqda Haraagga Kiimikadda ee lagu daadiyo Badda Somalia.
Xigasho: ANSA
©Radio Dalsan
