Xildhibaanada Golaha Shacabka Baarlamaanka Federaalka Soomaaliya ayaa Maanta la filayaa in kulankoodii caadiga ahaa ay ku yeeshaan Xaruntooda Villa Hargeysa ee Magaalada Muqdisho.
Ajendaha kulanka Xildhibaanada ayaa waxaa uu yahay Akhrinta Koowaad ee dib u eegista heshiisyadii ay horey u galeen dowladda Federaalka Soomaaliya iyo Turkiga iyo Ajendayaal kale.
Waxaa xalay loo diray Xildhibaanada Golaha Shacabka fariimo ku aadan in Maanta oo Isniin ah uu jiro kulan, isla markaana looga baahan yahay inay ka soo qeyb galaan si loo dardargeliyo howlasho ee horyaalla Baarlamaanka Soomaaliya.
Dhinaca kale Xildhibaan Maxamed Xasan Idirrs oo ka tirsan Golaha Shacabka ayaa waxaa uu sheegay in Guddoonka Golaha Shacabka Baarlamaanka Soomaaliya Mooshin loo gudbiyay.
Mooshinka ayuu Xildhibaan Maxamed Xasan Idirrs ku sheegay inuu yahay mid lagu dalbanaayo in tiradda Baarlamaanka Federaalka lagu daro 30 Xildhibaan oo dheeraad ah oo la gaarsiiyo 305 Xildhibaan.
Xildhibaan Maxamed Idirrs Ma shaacin tirada Xildhibaanada ku saxiixan Mooshinka loo gudbiyay Guddoonka Baarlamaanka, hayeeshee warar la helayo ayaa sheegaya inay ku saxiixan yihiin in ka badan 60 Xildhibaan.