Madaxweynaha dowlad Goboleedka Jubbaland Axmed Maxamed Islaam Axmed Madoobe oo maalmihii lasoo dhaafay ku sugnaa dalka Kenya ayaa Maanta dib ugu laabtay Magaalada Kismaayo ee Xarunta Gobolka Jubbada Hoose.
Madaxweyne Axmed Madoobe ayaa waxaa Garoonka diyaaradaha Sayid Maxamed Cabdulle kusoo dhaweeyay Labada Madaxweyne kuxigeen ee Jubbaland iyo xubno ka tirsan labada Golle ee Maamulka, isagoo ka mahadceliyay soo dhaweynta loo sameeyay.
Madaxweynaha Jubbaland ayaa Magaalada Nairobi maalmihii lasoo dhaafay u joogay xaalad Caafimaad, waxaana socdaalkii halkaas ku welinayay xubno ka tirsan Maamulkiisa.
Axmed Maadobe ayaa la sheegay inuu xaalad awgeed uga baaqday ka qeyb galka Shirkii Madaxweyne Maxamed Cabdullaahi Farmaajo, qaar kamid ah Madaxda maamul Goboleedyada iyo Gobolka Banaadir ku yeesheen Magaalada Dhuusamareeb.
Si kastaba Puntland iyo Jubbaland ayaa si Cad u shaaciyay inay kasoo horjeedaan qodobadii kasoo baxay Shirkii Dhuusamareeb 3, kaasi oo heshiis rasmi ah looga gaaray Doorashada dalka ee 2020/2021, iyadoona labada Madaxweyne aysan ka qeyb gelin shirka.
