Madaxweynaha muddo xileedkiisa dhammaaday ee Maxamed Cabdullaahi Farmaajo ayaa Maanta oo sabti ah magacaabay Agaasimaha Guud ee Madaxtooyada Jamhuuriyadda Federaalka Soomaaliya.
Wareegto uu soo saaray Madaxweyne Farmaajo ayaa waxaa xilka Agaasimaha cusub loogu magacaabay inuu noqdo Prof. Maxamed Cabdullaahi Ciise (Dheere), isagoo bedelaya Agaasimihii hore ee Madaxtooyada Cabdisaciid Muuse Cali.
Dhawaan ayey markii Ra’iisul Wasaaraha Xukuumadda xilgaarsiinta Maxamed Xuseen Rooble uu Cabdisaciid Muuse Cali u magacaabay Wasiirka Wasaaradda Arrimaha Dibadda, kadib markii xilka laga qaaday Wasiirkii hore ee Maxamed Cabdirisaaq Maxamuud..
Cabdisaciid Muuse ayaa si rasmi ah ula wareegay xilka Wasaaradda Arrimaha Dibadda Soomaaliya, waxaana maalmaha soo socda la filayaa inuu xilka Agaasimaha Madaxtooyada Qaranka ku wareejiyo Agaasimaha cusub ee uu magacaabay Madaxweyne Farmaajo.
