Warar dheeraad ah ayaa kasoo baxay Shil gaari oo saacadihii lasoo dhaafay ka dhacay duleedka deegaanka xananbuure ee Goboka Galgaduud ee Maamulka Galmudug, kaasi oo geystay khasaaro dhimasho iyo dhaawac.
Shilkaas dhacay ayaa waxaa uu ka dambeeyay, kadib markii uu rogmaday gaari nooca deegaanada Galmudug looga yaqaano Proboxes oo ka baxay Magaalada Dhuusamareeb, xili uu ku socday xawaare sare, uuna mar qura wadada ka baxay.
Dad ayaa waxaa ay kusoo warrameen in shilkaas uu ku dhintay Wiil dhalinyaro ah oo saarnaa gaariga, halka qof kalena uu dhaawac soo gaaray, waxaana Meydka iyo dhaawaca la geeyay Xarun Caafimaad.
Shilal kala duwan oo geystay khasaaro isugu jira dhimasho iyo dhaawac ayaa horey uga dhacay deegaano ka tirsan Gobolka Galgaduud, waxaana inta badan shilalka halkaas ka dhacay loo sababeeyaa darawalada oo gaadiidka  xawaare sare ku wada.
