Hogaamiyaha Xisbiga Wadajir Cabdiraxmaan Cabdishakuur Warsame ayaa waxaa uu ka hadlay xilka qaadisii lagu sameeyay Taliyihii Ciidanka Xoogga dalka Soomaaliyeed Genaraal Daahir Aadan Cilmi Indha-qarshe
C/raxmaan C/Shakuur ayaa sheegay in shaki badan uu abuurayo sababta loo bedelo Ciidamada Guulaha soo hoynaya,isla markaana la bedelayo iyagoo jiida hore ee dagaalka ku jira.
Sidoo kale Hogaamiyaha Xisbiga Wadajir ayaa tilmaamay in Nin 5 taliye 2 sano iyo bar ku beddelay in uusan dagaal kula jirin Al-shabaab.
“Allaha guuleeyo wiilasha iyo hablaha Ciidanka Xoogga Dalka ka tirsan ee dagaalka kula jira Al-shabaab furamaha dagaalka ku jira. Waxaase shaki abuuraya sababta ciidankii oo guulo soo hoynaya, loo beddelay taliyihii isagoo weliba jiida hore ee dagaalka ku jira. Nin 5 taliye, 2 sano iyo bar ku beddelay Al-shabaab dagaal kulama jiro”ayuu yiri C/raxmaan C/Shakuur.
Sikastaba halka Hogaamiyaha Xisbiga Wadajir Cabdiraxmaan Cabdishakuur Warsame ayaa waxaa uu kusoo aadayaa,iyadoo Golaha Wasiirada Xukuumadda Soomaaliya ay xilka qaadis ku sameeyeen Taliyihii Ciidanka Xoogga dalka Soomaaliyeed Genaraal Daahir Aadan Cilmi Indha-qarshe xili uu ku sugnaa Degmada Awdheegle oo dhawaan Ciidanka dowladda ay Al-shabaab kala wareegeen.