Warar dheeraad ah ayaa ka soo baxaya dagaal sababay dhimasho iyo dhaawac oo Maanta ka dhacay deegaano ka tirsan Gobolka Galgaduud ee bartamaha Soomaaliya.
Dagaalkaasi ayaa waxa uu sigaar ah uga dhacay deegaanka lagu magacaabo Kaxandhaale e Gobolka Galgaduud,waxaana uu u dhexeeyay laba Maleeshiyo beeleed oo wada dega deegaankaasi,kuwaasi oo isku heystay arrimo la xiriira dhul-daaqsin.
Dadka deegaanka Kaxandhaale ayaa waxa ay inoo sheegeen in dagaalka uu ahaa mid xoogan,isl markaana la isku adeegsaday hubka noocyadiisa kala duwan,iyadoona uu ka dhashay Khasaaro isugu jira dhimasho iyo dhaawac oo soo kala gaaray labada dhinaca ee dagaalamay.
Ugu yaraan 15 ruux ayaa la sheegay in dagaalka  oo ay haweyney ku jirto,halka 10 qof kalena ay ku dhaawacmeen,waxaana dadka dhaawacmay loo soo qaaday Isbitaalka weyn ee ku yaalla Degmada Cadaado ee Gobolka Galgaduud.
Dhinaca kale Madaxweynaha Maamulka Galmudug Axmed Ducaale Geelle Xaaf ayaa waxa uu baaq u diray dhinacyada ku dagaalamaya deegaanka Kaxandhaale,isagoo ugu baaqay in si deg deg ah loo joojiyo dagaalkaasi oo dhiiga badan ku daadanayo.
Ilaa iyo hadda ma jirto weli cid kala dhaxgashay maleeshiyadka ku dagaalamaya Deegaanka Kaxandhaale ee Gobolka Galgaduud.
Deegaanka Kaxandhaale ee Gobolka Galgaduud ee bartamaha Soomaaliya ayaa waxaa dhowr jeer oo hore ku dagaalamay maleeshiyaad,iyadoona Maanta markale halkaasi uu ka dhacay Dagaal xoogan.
