Saraakiisha dalalka Japan iyo Koonfurta Kuurya ayaa sheegay inay Waqooyiga Kuurya saakayto 4-Gantaal ku tijaabiyeen meel ka baxsan Xeebaha W/galbeed ee dalka Japan.
Qaar ka mid ah Gantaaladaasi ayaa ku dhacay Badda meel 300-KM u jirta Xeebaha Japan, sida uu sheegay Wasiirka Difaaca ee Japan, Tomomi Inada.
Tijaabaddan ayaa timid, iyadoo ay Milliteriga Maraykanka iyo kuwa Koonfurta Kuurya ku guda-jiraan Carbis Milliteri oo u muuqda inay ugu diyaar-garoobayaan Dagaal.
Saraakiisha Milliterig Koonfurta Kuurya ayaa sheegay inaysan Gantaaladaasi u muuqaal ekayn Gantaalada isaga kala goosha Qaaradaha ee intercontinental ballistic missiles (ICBM), kuwaasi oo gaari kara Maraykanka.
Gantaalladan ay Waqooyiga Kuurya tijaabiyeen ayaa la sheegay inay wax ka dili karaan 1,000 KM.
Dhinaca kale, Dowladda Maraykanka ayaa cambaaraysay Tijaabadaasi, sida lagu sheegay War-saxaafadeed uu soo saaray Ku-simaha Afhayeenka Waaxda Arrimaha Dibedda Maraykanka, Mark Toner.
Waxa uu tilmaamay inay Tijaabadaasi xadgudub ku tahay Qaraaradii Golaha Ammaanka ee QM ee lagu cambaareeyey Tijaabada noocaasi ah.
©Radio Dalsan
