Madaxweynihii hore ee Soomaaliya ahna Guddoomiyaha Midowga Musharaxiinta Sheekh Sh. Sheekh Axmed ayaa si kulul uga hadlay weerarkii saaka Al-shabaab ku qaadeen deegaanka Ceelbaraf ee Gobolka Shabeellaha Dhexe.
Sheekh Shariif oo Qoraal soo saaray ayaa waxaa uu ku Cambaareeyay weerarkii Al-shabaab ku qaadeen Saldhiga Ciidanka ATMIS ku leeyihiin Ceelbaraf, kaasi oo geystay khasaaro aad u farabadan oo isugu jiray dhimasho, dhaawac iyo burbur hantiyadeed.
Sheekh Shariif ayaa weerarkii dhacay ku tilmaamay mid lala beegsaday dad shacab ah oo ciideysanaya, wuxuuna tacsi u diray dadkii shacabka ahaa ee ku dhintay weerarka, isagoo Caafimaad u rajeeyay dadka dhaawacmay.
“Waxaan tacsi u dirayaa, lana qaybsanayaa xanuunka ehellada dadkii ku dhintay weerarkaas iyo kuwa dhaawaca ah. Weerarkaan -oo ah mid argagixiso oo lala beegsaday dad shacab ah oo ciideysanaya- waa mid dadkeenna loogu diiddan yahay in ay si nabad ah ugu noolaadaan dalkooda’ ayuu yiri Sheekh Shariif.
Al-shabaab warar ay ku qoreen barahooda Internet-ka ayaa waxaa ay ku sheegteen in weerarkii saaka ku qaadeen deegaanka Ceelbaraf ay ku dileen ugu yaraan 173 Askari oo ka tirsan Ciidanka ATMIS gaar ahaan kuwa Burundi, isla markaana ay dhaawacmeen tobanaan kale oo Askari.
Weerarkaan oo dhacay waaberigii hore ee saaka ayaa waxaa uu ku bilowday qaraxyo Is-miidaamiim ah oo loo adeegsaday gaadiid laga soo buuxiyey waxyaabaha qarxa, waxaana weerar kadib dhacay dagaal culus oo dhexmaray Ciidanka ATMIS iyo Al-shabaab.
