Maxkamadda Maleeshiyadda Xuutiyiinta ku leeyihiin caasimadda dalkaasi ee Sansa waxay shalay dil toogasho ah ku xukuntay 30 qof oo lagu eedeeyey inay u basaasi jireen Isbahaysiga Milliteriga Sacuudiga ee weerarka ku haya Xuutiyiinta.
Ilo Garsoorka ayaa sheegay in dadka la soo eedeeyey ku jiraan Aqoonyahano, Culumaa’udiin, Arday iyo Ganacsato, kuwaasi oo ay Xuutiyiinta u xirnaa ugu yaraan hal sanno.
Dhibanayaasha dilka lagu xukumay waxaa ka mid ah Yuusuf Al-bawaab oo ah Professor ku takhasusay Luqadaha, kaasi oo la xiray dabayaaqadii sannadkii 2016-kii.
Dhinaca kale, Hay’adda u dooda Xuquuqda Aadanaha ee Amnesty International waxay cambaareeyeen Xukunkaasi, waxayna ugu baaqeen Xuutiyiinta inay sii daayaan dadka ay dilka ku xukumeen.
