Wararkii ugu danbeeyay Sarkaal Ciidan oo saaka lagu dilay Magaalada Muqdisho

Waxaa saaka xaafadda Sii-Sii ee degmada Deyniile ee magaalada Muqdisho lagu dilay Sarkaal la sheegay inuu ka tirsanaa Ciidanka dowladda Federaalka gaar ahaan kuwa Milateriga, kaasi oo lagu magacaabi jiray Cabdullaahi Xuseen Warsame (Waran ).

Dad ayaa waxaa ay kusoo warrameen in rag dhallinyaro ah oo watay Mooto nooca laba lugaaleyda ah ee Fekon-ta loo yaqaan ay dileen Jeneraal Cabdullaahi Xuseen Waran oo durbadii ku dhintay goobta lagu toogtay.

Kooxihii ka danbeeyay dilka loo geystay Jeneraalka ka tirsanaa Ciidanka Milateriga dowladda Federaalka Soomaaliya ayaa goobta si dhaqsi ah uga cararay, mana jirto cid loo soo qabtay dilkaas khaarijinta ahaa ee ka dhacay degmada Deyniile ee Muqdisho.

Dilka Cabdullaahi Xuseen Warsame (Waran ) ayaa kusoo aaday, iyada oo xalay kooxo hubeysan oo watay bastoolado ay gudaha degmada Dharkeenley ku dileen, Imaamkii masaajidka Dabaqeynka ee degmada Dharkeenley Sheekh Cabdicasiis Maxamed Xirsi.

Muqdisho ayaa waxaa marar kala duwan lagu dilay dad shacab ah, mas’uuliyiin, Askar iyo xubno kale, waxaana inta badan dilalkii ka dhacay magaalada Muqdisho mas’uuliyadooda sheegtay dagaalamayaasha Al-shabaab.

About Dalsan Editor

View all posts by Dalsan Editor