Waxaa saakay markale uu dagaal xoogan dib uga qarxay deegaanka Qalan-qale ee ku yaalla Waqooyiga Gobolka Galgaduud, kaasi oo u dhexeeya laba Maleeshiyo beeleed oo deegaanka wada-dega.
Dadka deegaanka oo la hadlay warbaahinta ayaa waxaa ay u sheegeen inay xalay ilaa iyo saakay ay maqlayaan dhawaqa rasaas xoogan oo ay isdhaafsanayaan labada Maleeshiyo oo maalmihii lasoo dhaafay Qalan-qale ku dagaalamayay.
Ciidamada dowladda Federaalka Soomaaliya iyo kuwa Galmudug ee ku baxay dagaalka ayaa weli ku howlan sidii loo joojin lahaa dagaalka dib uga qarxay Qalan-qale, in kastoo aysna ku guuleysan joojinta rasaasta.
Sidoo kale waxaa lasoo sheegayaan in Ciidamada dowladda ay ku adkaatay tegista goobaha ay isaga dhow yihiin Maleeshiyaadka, maadamaan labada dhinac ay isku adeegsanayaan gaadiidka dagaalka iyo hub kale oo Culus.
Khasaaraha ka dhashay dagaalka ayaa lagu soo waramayaa inuu kordhay, waxaana farumaha laga qaaday Meydad iyo dhaawacyada dhinacyada dagaalamaya, iyadoo dadka dhaawacmay loo qaaday Xarumo Caafimaadka.
Dhinaca kale waxaa degan xaaladda deegaanka Xananbuure ee Gobolka Galgaduud oo uu dagaal ku dhexmaray laba Maleeshiyo beeleed, waxaana halkaas ku dhintay 11 qof, halka 25 qof kalena ay ku dhaawacmeen.