Warar dheeraad ah ayaa kasoo baxaya dagaal xoogan oo Maanta ka dhacay deegaanka Goof Gaduud buurey ee Gobolka Baay, kaasi oo u dhexeeyay Ciidanka xoogga dalka iyo dagaalyahano ka tirsan Al-shabaab.
Dagaalkan ayaa waxaa uu ka dambeeyay kadib markii Al-shabaab saakay weerar ay ku qaadeen deegaanka GoofGaduud, isla markaana ay la wareegeen gacan ku heynta Saldhig Ciidanka Koonfur Galbeed halkaas ay ku leeyihiin.
Dadka deegaanka ayaa sheegaya in Ciidanka xooga dalka ay weerar culus ku qaadeen deegaanka GoofGaduud, iyagoona halkaas kala wareegay Al-shabaab, waxaana dagaalka ka dhashay Khasaaro isugu jira dhimasho iyo dhaawac.
Saraakiisha Ciidanka dowladda oo la hadlay warbaahinta ayaa sheegay in dagaalkii ka dhacay Gobolka Baay lagu dilay 20 ka tirsan dagaalamayaasha Al-shabaab, sidoo kalena lagu dhaawacay tirro intaas ka badan.
Sidoo kale Saraakiil ka tirsan Ciidanka Xoogga Dalka Soomaaliya ayaa sheegay in laga warqabay weerarka Al-Shabaab, isla markaana ay ciidamada qorsheynayaan sidii guud ahaan deegaannada Koonfur Galbeed looga saari lahaa.
War qoraal oo lagu daabacay baraha Internet-ka Al-shabaab ayaa waxaa ku sheegteen in dagaalkii Goofguduud Buureey ay ku dileen 11 Askari oo ka tirsan dowladda uuna kamid yahay Macallim Dhaayoow oo ahaa taliye ku xigeenkii saldhigga Goofguduud Buureey.
Al-shabaab ayaa sidoo kale sheegtay in gacanta ku dhigeen saano hub ah oo uu kamid yahay qoriga loo yaqaan PKM, kuwaasi oo lahaayeen Ciidanka dowladda.
