Madaxweynaha Mareykanka Donald Trump ayaa sheegay in faahfaahinta qorshe cusub oo la xiriira Marinka Qasa lagu dhawaaqi doono 24 saac gudahood, iyadoo wararka hordhaca ah ay sheegayaan in la qorsheynayo dhisidda maamul kumeelgaar ah oo Mareykanku hoggaaminayo.
Sida ay werisay wakaaladda Reuters, maamulkaasi cusub looma ogolaan doono Xamaas ama Maamulka Falastiiniyiinta, waxaana la filayaa in ay hoggaan u noqdaan farsamayaqaano Falastiiniyiin ah. Qorshahan ayaa la barbardhigay midkii Mareykanku ka hirgeliyay Ciraaq 2003-dii.
Dhanka Israa’iil, muran ayaa ka taagan tirada dadka la haysto ee Qasa. Trump ayaa sheegay in 21 qof ay nool yihiin, halka qoysaska ay sheegeen inay jiraan 24, taasoo kicisay caro iyo eedeyn ka dhan ah dowladda Israa’iil.
Milatariga Israa’iil ayaa shaaciyay in 58 qof wali lagu haysto Qasa, 34 ka mid ahna la dilay. Guddoomiyaha Xuquuqda Aadanaha ee QM, Volker Türk, ayaa si kulul uga digay weerarro dheeraad ah oo Israa’iil ku ballaarinayso Qasa, isagoo sheegay in barakicinta, go’doominta cunto iyo daawo, iyo hanjabaadaha militari ay noqon karaan dambiyo dagaal.
Dalka Spain iyo dhowr dal oo Yurub ah ayaa cambaareeyay qorshaha, waxayna ku baaqeen in la ilaaliyo sharciyada caalamiga ah, iyadoo Spain ay qorsheyneyso qaraar ay hor geyso Golaha Guud ee QM si loo joojiyo “xasuuqa” Qasa.
