Ciidamo lakala dhex dhigay Maleeshiyaadkii ku dagaalamay Xaafado ka mid ah Deeyniile

Shalay ilaa xalay waxaa dagaalo qaraar ay Xaafado ka tirsan degmada Deeyniile ku dhexmarayeen Ciidamo kawada tirsan dowladda,balse qabiil u abaabuleen.

Dagaalkaas ayaa geystay khasaaro isugu jira dhimasho iyo dhaawac dad Shacab ah u badan Iyo barakaca kuwo kale oo deganaa Xaafadaha lagu dagaalamay ee 77 Iyo Haanta Dheer ee Degmada Deeyniile.

Saraakiil ka tirsan Ciidamada xoogga dalka Soomaaaliya ayaa Dalsan waxa ay u xaqiijiyeen in Ciidamo laga diray Xarunta Wasaaradda Gaashaandhigga la geeyey goobihii lagu dagaalamay,iyaga oo kala dhexgalay Ciidamadii dagaalamay.

Dadka ku nool Xaafadaha lagu dagaalamay ayaa iyana waxa ay sheegeen in Saraakiil ka tirsan ciidamada xoogga dalka ay goobta tageen,balse ay arroor hore isaga tageen maleeshiyaadkii dagaalamay oo watay Gaadiidka dagaalka iyo Tuutaha Ciidanka.

Dagaalka ka dhacay Xaafadaha Haanta Dheer iyo Xerada 77 ayaa ah mid soo laab laabtay,waxaana ay u muuqataa in dowladda Soomaaaliya ay xadidi la’dahay waxka qabashada dagaaladaas.