Waxaa Goordhow Garoonka diyaaradaha Aadan Cadde ee Magaalada Muqdisho ka ambabaxay wafdi uu hoggaaminayay Guddoomiyaha Baarlamaanka Hirshabeelle oo maanta diyaarad ay saarnaayeen Hawada cilad ku qabsatay.
Wafdiga Guddoomiye Cabdixakiin Luqmaan Maxamed oo ay ka yihiin Xildhibaano, Wasiiro iyo saraakiil Ciidan ayaa wajahan Magaalada Baladweyne ee Xarunta Gobolka Hiiraan, iyagoona saacad ka degi doona Garoonka Ugaas Khaliif.
Wafdigaan oo saakay diyaarad ka raacay Garoonka Jowhar ayaa xili ay dhawaayeen Garoonka Baladweyne waxaa diyaarada ka ciladoobay mid kamid Matooradeeda, iyagoona si deg deg ah dib ugu soo laabtay Muqdisho oo Goordhow ay ka baxeen.
Wasiirka amniga Hirshabeelle Maxamed Cabdiraxmaan Kheyre oo wafdiga kamid ahaa ayaa sheegay in duuliyihii diyaarada waday uu ku wargeliyay in diyaarada ay cilad qabsatay, kadiba ay dareemeen welwel badan, iyagoona si nabad ah ku yimi Muqdisho.
Ujeedka wafdiga ka socday Hirshabeelle ee Magaalada Baladweyne ayaa waxaa uu yahay sidii loo xalin lahaa tabashooyinkii ka dhashay doorashadii ka dhacday Magaalada Jowhar iyo dhismaha maamulka Hirshabeelle oo ay qabaan dadka degan Hiiraan.
Dhinaca kale Madaxweyne Cali Guudlaawe ayaa dhowr mar ka baaqda safar uu ku tegi lahaa Baladweyne oo si weyn looga soo horjeedo isaga, waxaana halkaas ku sugan Madaxweyne ku-xigeenkiisa Yuusuf Axmed Hagar Daba-geed.
Maalmihii lasoo dhaafay ayaa waxaa Baladweyne ka dhacayay banaanbaxyo rabashado watay oo looga soo horjeeday Hirshabeelle iyo Madaxweyne Cali Guudlaawe, iyadoona xusid mudan tahay in banaanbaxayada dad loo xiray.
