Warar dheeraad ah ayaa ka soo baxaya Shil gaari oo Maanta ka dhacay Magaalada Muqdisho gaar ahaan degmada Yaaqshiid ee Gobolkan Banaadir.
Shilkan ayaa waxaa uu yimid kadib markii ay isku dhaceen Mooto Bajaaj iyo Gaari nooca xamuulka ah,isla markaana waxaa ka dhashay Khasaaro isugu jira dhimasho iyo dhaawac oo soo gaaray dadkii saarnaa Mootada iyo Gaariga.
Dad goobjoogayaal ah oo la hadlay Idaacada Dalsan ee Magaalada Muqdisho ayaa u sheegay in shilka ka dhacay Degmada Yaaqshiid ay geeriyoodeen 3 ruux,halka 5 kalena ay ku dhaawacmeen,waxaana dhaawacyada loo qaaday mid kamid ah goobaha Caafimaad ee ku yaalla Muqdisho.
Goobta uu falka ka dhacay ayaa waxaa tegay dad shacab ah,kuwaasi oo gurmad deg deg ah u sameeyay dadkii halkaasi ku waxyeeloobay.
Mararka qaar ayaa waxaa Magaalada Muqdisho ka dhaca shilal kala duwan oo geysta Khasaaro isugu jira dhimasho iyo dhaawac.
