Senator Cabdi Xasan Cawaale Qeybdiid oo ka tirsan Aqalka Sare ee Baarlamaanka Federaalka ayaa ka hadlay Go’aankii Galmudug iyo Hirshabeelle ay uga soo horjeesteen muddo kordhintii loo sameeyay Madaxweyne Farmaajo
Cabdi Qeybdiid oo galabta shir jaraa’id u qabtay warbaahinta ayaa waxaa uu marka hore soo dhaweeyay Go’aankii Madaxweyne Qoorqoor iyo Cali Guudlaawe ku diideen muddo kororsiga Farmaajo iyo taageeradii uu u muujiyay Ra’iisul Wasaare Maxamed Xuseen Rooble.
Sidoo kale Cabdi Qeybdiid ayaa uga digay Guddoonka Golaha Shacabka iyo Xildhibaanada inay qaadaan go’aamo waxyeeleyn kara tallaabadii Ra’iisul Wasaare Rooble iyo Madaxda dowlad Goboleedyada Galmudug iyo Hirshabelle.
“Waxaan uga digayaa Guddoonka Golaha Shacabka iyo Xildhibaannada in aysan ku dhaqaaqin wax carqaladeynaya doorashada, haddii arrintaas imaadana cawaaqibka ay leedahay iyo dhibaatada ka timaada iyagaa qaadaya, arrintii ay qaadeen 12-kii bishii April ee aheyd kordhinta labada sano waaye waxa dadna u dhintay dadna u dhaawacan yahay, dadna u barakaceen” ayuu yiri Senator-ka
Senator Cabdi Xasan Cawaale ayaa tilmaamay in loo baahan yahay in la fuliyo amarkii uu bixiyay Rooble ee ahaa in Ciidanka soo galay Muqdisho ee kasoo baxay furimaha dagaalka dib loogu celiyo xeryahooda, lana joojiyo abaabulka Ciidan ee weli ka socda Muqdisho.
