Hooyo iyo 7 carruur oo ay dhashay ayaa la sheegay inay bara-kaceen kadib, markii uu dab baabi’iyey gurigii ay ka deganaayeen magaalladda MILKAWAUKEE ee Gobalka WISCONSIN ee dalka Maraykanka.
Sarkaalka Bisha Cas ee Gobalka ugu qaabilsan dhinaca Isgaarsiinta, JUSTIN KERN ayaa sheegay inay Qoyskaasi barakaceen habeenkii Isniinta, kadib, markii uu dab ka kacay gurigii ay deganaayeen.
Waxa uu sheegay inaysan Hooyadda Qoyskaasi ku hadli Karin Luqadda English-ka, isla markaana uu caawiyey mid ka mid ah carruurteeda oo xiriir la soo sameeyey Dab-damiska.
Sarkaalkaasi waxa uu tilmaamay in da’da carruurta qoyska Soomaalida ee bara-kacay u dhexeyso 5 jir ilaa 13-jir.
Dhinaca kale, waxaa guriga ku gubtay sarriiro cusub iyo dhar ay Hooyadda dhawaan u soo iibisay Carruurteeda, mana muuqato inay Qoyskaasi awoodi karaan inay si degdeg ah dib ugu laabtaan gurigooda gubtay.
Hay’adda Bisha Cas ayaa sheegtay inay Qoyskaasi ka caawiyeen meel ay degaan iyo qalabka muhiimka u ah nolosha xilligan adag oo ay ku jiraan.