Wasiirka Arrimaha Gudaha Xukuumadda Federaalka Soomaaliya Mudane Cabdi Maxamed Sabriye ayaa sheegay in Guddi ay u saareen baaritaanka dhacdadii 23kii bishan ka dhacday isgooyska KM4 ee magaalada Muqdisho, halkaas oo ay is rasaaseyn ku dhex martay ciidamada Nabad Sugidda Qaranka iyo kolanyo uu saarnaa Taliyeha Ciidamada AMISOM.
Magacaabista guddigan ayaa ka dambeysay kadib kulan ay magaalada Muqdisho ku yeesheen Wasiirka Arrimaha Gudaha Dowladda Soomaaliya, Wasiiru Dowlaha Amniga,Taliyeyaasha Hay’adda Nabad Sugida iyo Wakiilka Midowga Afrika ee Soomaaliya Faransisco Madera oo ay wehliyaan Taliyaasha Booliska iyo Militariga ee AMISOM.
Wasiirka arrimaha Gudaha Cabdi Maxamed Sabriye ayaa balanqaaday in si hufan ay u sameyn doonaan baaritaankaasi, isagoo dhanka kale ka tacsiyadeeyey geerida Askarigii NISA ee geeriyooday,wuxuuna eebe uga baryay in uu bogsiiyo dadkii ku dhaawacmay dhacdadaasi.
Dhanka kale Danjiraha Midowga Afrika ee Soomaaliya ayaa sheegay in uu ka xunyahay falkii dhacay,isagoo intaasi ku daray in uusan marnaba soo laaban doonin falkaasi.
Danjire Francisco Madera ayaa sheegay in ay diyaar u yihiin ka qeyb qaadashada baaritaanka lagu sameynayo sida ay u dhacday arrintaasi,si loo ogaado xaqiiqda jirta.
